Kjo javë do të jetë “shumë kritike” për bisedimet e luftës Rusi-Ukrainë pasi Uashingtoni vendos nëse është një “përpjekje në të cilën duam të vazhdojmë të përfshihemi”, tha Sekretari i Shtetit i SHBA-së, Marco Rubio.

Rubio u tha mediave amerikane se Donald Trump nuk ka vendosur dënime të reja ndaj Rusisë, sepse ai ende shpreson se diplomacia mund t’i japë fund luftës, shkruan BBC.

Kjo vjen pasi Trump zhvilloi një takim të shkurtër me udhëheqësin ukrainas Volodymyr Zelensky në Vatikan përpara funeralit të Papa Françeskut të shtunën.

Duke përditësuar gazetarët të dielën, Trump tha se ai beson se Zelensky është i gatshëm t’i dorëzojë Krimenë Rusisë si pjesë e një marrëveshjeje paqeje – pavarësisht refuzimeve të mëparshme të Kievit për çdo propozim të tillë.